Russel Botman: "Engels verdring Afrikaans nié by US "

Die Burger (25 Junie 2010)
Liesl Peyper skryf:

"Die Universiteit Stellenbosch (US) bied graadkursusse ook in Engels aan sodat hy uitgerekte hofsake kan vermy."
Dít was gister prof. Russel Botman, US-rektor, se onmiddellike antwoord toe hy by die Kaapse persklub oor Maties se taalbeleid uitgevra is.
Botman was gister die gasspreker by die Kaapse Persklub, waar hy uitgewei het oor die US se taalbeleid en die uitdagings wat daarmee gepaardgaan.
’n Lid van die gehoor, mnr. Ken Andrew, ’n voormalige DA-LP, wou by Botman weet waarom die US hom genoop voel om kursusse “soos ingenieurswese” in Engels aan te bied.
“Daar ís dan universiteite, soos die Universiteit van Kaapstad en die Universiteit van Wes-Kaapland, rondom Stellenbosch wat dié kursusse in Engels aanbied.”
Botman, wat sy woorde versigtig gekies het, het gesê studente en hul ouers sal Stellenbosch “vir baie lank in die hof besig hou” as die universiteit nie ook Engels as ’n onderrig-opsie bied nie.
“Hulle en hul ouers sal ons dagvaar. Die Grondwet sê ook die deure van onderrig moet (vir almal) oop wees. Dis ’n baie ernstige en moeilike regsvraagstuk.
“Ons het nog nie gesien dat iemand bereid is om dit (in ’n hof) te toets nie.
“Maar wil die universiteit hom vir so iets oopstel? ’n Mens wil nie graag hê die universiteit moet daardie beeld hê nie.”
In sy toespraak het hy deurgaans beklemtoon dat Afrikaans steeds die hoofonderrigtaal aan die US is en ontken dat Engels die stand van Afrikaans in die gedrang bring.
“Laat ek dit baie duidelik stel: Stellenbosch blý ’n universiteit waar Afrikaans die hoofonderrigtaal is, maar met blootstelling aan Engels óók in die leersituasie.”
Dit is die US se beleid om Afrikaans as akademiese taal in ’n “meertalige konteks” te ontwikkel, het Botman gesê.
Volgens hom kan Afrikaans slegs beskerm word as dit beskou word as ’n “taal tussen ander tale”.
“ ’n Soort linguistieke ubuntu, dus.”
Oor die kritiek wat die US moet verduur weens sy dubbelmedium-onderrig, het Botman gesê nie net ontvang hy sterk bewoorde briewe van Afrikaanssprekende ouers nie, maar ook van Engelssprekende ouers wat hom daarvan beskuldig dat hy bruin Engelssprekende studente wil verhoed om te verengels.
“Hulle sê ek wil Engelssprekende studente laat de-angliseer.”
Volgens Botman sal bruin studente wat verkies om in Engels onderrig te kry goed in ’n meertalige omgewing funksioneer.
“Ons móét voorsiening maak vir arm, bruin studente van die platteland. Navorsing van (prof. Lawrence) Schlemmer wys dat 75% van Wes-Kaapse bruin studente verkies om in Engels onderrig te kry,” het Botman bygevoeg.

Luister na 'n klankgreep van Russel Botman voor die Kaapse Persklub deur hier te klik.

Prof Lawrence Schlemmer ontken dat hy ooit bevind het dat 75% van Wes-Kaapse bruin studente verkies om in Engels onderrig te kry. Lees sy brief deur hier te klik.
Prof Botman antwoord hierop dat hy "buite konteks aangehaal is"; lees sy reaksie deur hier te klik. Wat presies die "buite konteks" is, verduidelik hy nie.
Nog briewe oor Botman se stelling dat die US Engelse kursusse aanbied "om uitgerekte hofsake te vermy" kan gelees word deur hier te klik.
"Dit kan nie US in hof laat beland" verduidelik nog 'n briefskrywer; lees sy brief deur hier te klik.

Minister stel Groepe in US Raad aan

Oud-Maties het met groot verbasing verneem dat die Minister van Hoër Onderwys, dr Blade Nzimande (beter bekend as Sekretaris van die SA Kommunistiese Party), vir mnr Francois Groepe, bestuurshoof van Media-24, as lid van die US Raad in Junie 2010 aangestel het.
Dit kom nadat Groepe vernietigend verslaan is in die verkiesing van US Raadslede deur die Konvokasie, wat in Maart 2010 gehou was. Nie-amptelik is verneem dat Groepe slegs 'n dubbelsyfer getal stemme op hom verenig het (uit meer as 5000 stemme wat uitgebring is). Die stemuitslae is geheim gehou deur die US Registrateur, mnr Johann Aspeling, "om verleentheid vir mense in hoë posisies te verhoed".
Groepe was voorheen deur die vorige Minister van Nasionale Onderwys as die Minister se "verteenwoordiger" ('n term wat hy self gebruik het) in die US Raad aangestel, maar sy termyn het in Junie 2009 verstryk en hy is nie onmiddellik daarna deur die Minister van Hoër Onderwys heraangestel nie. Hy het as lid van die US Raad bekendheid verwerf daarvoor dat hy 'n "mosie van sensuur" ingestel het teen 'n voormalige mede-raadslid, dr Marié Heese, nadat laasgenoemde 'n brief in Die Burger geskryf het. Dr Heese het kort hierna as US Raadslid bedank.
Groepe se aanstelling volg dieselfde patroon wat in 2006 gebeur het. Mnr Gerhard van Niekerk is in die 2006 verkiesing van US Raadslede deur die donateurskorps verpletterend verslaan deur mnr Jaco Maree. Die betrokke verkiesing was in omstredenheid gehul op grond van beweerde onreëlmatighede met die kieserslys vir donateurs. Onmiddellik hierna is Van Niekerk deur die destydse Minister van Onderwys as US Raadslid aangestel, op aanbeveling van Dr Edwin Hertzog, destydse Raadsvoorsitter. Sowel Hertzog as Van Niekerk het in die 2010 US Raadsverkiesing, saam met 'n ander onsuksesvolle kandidaat mnr Desmond Smith, opgetree as faksie wat o.a. Groep se kandidatuur bevorder het.

U.S. RAADSVERKIESING: NUUS

U.S. RAADSVERKIESING: UITSLAG DRA STERK BOODSKAP UIT

Ses toonaangewende Suid-Afrikaners is met oorweldigende meerderhede tot die Raad van die Universiteit Stellenbosch (US) verkies – vier deur die Konvokasie, tewete prof Wannie Carstens, dr George du Toit, adv Jan Heunis en dr Rhoda Kadalie, en twee deur die donateurs van die Universiteit, naamlik mnr George Steyn en prof PW van der Walt. Met hierdie uitslag het die pro-Afrikaanse beweging 'n baie duidelike boodskap uitgedra. Die ses suksesvolle kandidate se kandidatuur is gepromoveer deur die pro-Afrikaanse beweging, bestaande uit prof Hermann Giliomee, dr Marié Heese, prof Lina Spies en mnr Jacko Maree.

Dit is terselfdertyd 'n vernietigende neerlaag vir die Hertzogiete, 'n groep van drie bestaande uit dr Edwin Hertzog, mnr Gerhard van Niekerk (ondervoorsitter van die US Raad), en mnr Desmond Smith (wat later self as kandidaat vir die donateurs deelgeneem het, en hom aan die Hertzogiete onttrek het). Wenkbroue is gelig oor Van Niekerk se aktiewe deelname met die bevordering van bepaalde kandidate, veral aangesien dit van hom as ondervoorsitter van die US Raad verwag word om onpartydig te wees. Die Hertzogiete se kampanje is gevoer met e-posboodskappe en selfoonoproepe vanuit 'n spesiaal ingerigte "oorlogskamer" wat ingerig is by MediClinic, die maarskappy waarvan Edwin Hertzog die uitvoerende hoof is.

Nie 'n enkele een van hul kandidate is verkies nie, en nie-amptelik word verneem dat die verloorders oorweldigend verslaan is.
Lees verder deur hier te klik.

Vir 'n rubriek van Pieter Malan (Rapport) oor 'n meningsopname oor die verkiesing, klik op Maties is nie onder 'n kalkoen uitgebroei.

Die ware verhaal van US se swenk in die donker na Engels (Hermann Giliomee) (Nuut!)

"Staan op regte" die in-ding - "Op ’n muur op die US-kampus verskyn dié woorde van D.F. Malan: “Waar Stellenbosch vandag staan, staan Suid-Afrika môre.” Nie meer nie. Deesdae arriveer Stellenbosch eers môre of oormôre." - Tim du Plessis (Beeld) (Nuut!)

Nog 'n US Raadslid bedank: "Matie-besluite oor Afrikaans moet in howe beveg word," deur Jacko Maree (Repliek: Rapport, 2010-03-14)

Vir algemene nuus insake verwikkelinge op die taalfront aan die U.S., besoek gerus die blog http://afrikaansbymaties.blogspot.com
Verdere bespreking oor die verkiesing is te sien by Facebook.

DIE T-OPSIONISTE, DIE OMSENDBRIEWE EN DIE MENINGSOPNAME

Lees ook wat Pieter Malan skryf in Rapport van 2010-02-28: Maties is nie onder 'n kalkoen uitgebroei

Op 11 Februarie word ’n e-pos versprei vanaf die e-posadres matiekieser@gmail.com; die e-pos is onderteken deur dr Edwin Hertzog, mnr Desmond Smith en mnr Gerhard van Niekerk.

Edwin Hertzog is ’n voormalige lid en voorsitter van die US Raad; dit was tydens sy voorsitterskap (met Gerhard van Niekerk as ondervoorsitter) dat die nou gediskrediteerde T-opsie in 2002 aan die US ingevoer is. Desmond Smith is ’n voormalige US Raadslid.

In die e-pos versoek hulle “dat bekwame, goed toegeruste persone wat die U.S. in al sy fasette doeltreffend kan dien, verkies sal word.” Daarmee kan niemand sekerlik fout vind nie.

WIE IS HULLE?

Edwin Hertzog het twee jaar gelede as Voorsitter van die US Raad uitgetree aan die einde van sy termyn; hy het, as Konvokasie-verkose raadslid, dit wyslik geag om homself nie weer verkiesbaar te stel in die daaropvolgende verkiesing van raadslede nie.

Gerhard van Niekerk het vier jaar gelede as sittende US Raadslid, destyds aangewys deur die Donateurskorps, in ’n kontroversiële herverkiesing ‘n groot onderspit gedelf teen mnr Jacko Maree. Hy is onmiddellik weer in die US Raad heraangestel “as verteenwoordiger” (sy eie woorde) van die Minister van Onderwys, en dien tans as Ondervooritter van die US Raad.

Desmond Smith het twee jaar gelede aan die einde van sy termyn uitgetree as US Raadslid aangewys deur die Konvokasie; in die daaropvolgende herverkiesing het hy die onderspit gedelf. Tans stel hy hom beskikbaar as kandidaat vir verkiesing deur die Donateurskorps (en het hy hom glo onttrek van die selfaangestelde Hertzog-goepie).

Al drie is erkende T-opsioniste.

MENINGSOPNAME

Op 19 Februarie 2010 word ’n verdere e-pos versprei deur matiekieser@gmail.com met die versoek om deel te neem aan een van twee meningsopnames, waaroor Hertzog self skryf: “Een van die redes waarom ons in goeie trou ‘n meningspeiling doen is juis om uit te vind wat mense se menings is. U word dus aangemoedig om aan die meningspeiling(s) deel te neem.”

Een van die vrae in die “annonieme” (sic) meningspeiling is: “Is dit die primêre taak van die universiteit om Afrikaans te red?”

Hierdie is ’n onsinnige vraag want niemand, maar niemand verwag van die US om Afrikaans te “red” nie, netsoos niemand verwag dat UCT Engels moet “red”, of die Sorbonne Frans moet “red” nie.

Hierna volg die ewe onlogiese vraag: “Indien ja, hoe kan dit gedoen word sonder risiko, bv. sonder om internasionale akkreditasie in gevaar te stel? ”

Internasionale akkreditasie was nog nooit in gevaar o.g.v. onderrigtaal nie – vra die Duitse, Franse, Italiaanse en vele anders-as-Engelstalige universiteite.

Ten slotte word gevra: “Wat is vir jou as oud-Matie die belangrikste:

• “Akademiese statuur
• “Afrikaans as eksklusiewe onderrigtaal
• “’n Graad wat Internasionaal erken word”

Niemand vra dat die US “Afrikaans as eksklusiewe onderrigtaal” toepas nie. Kenners in die opstel van onsydige meningspeilings is eenparig van mening dat die meningsopname onwetenskaplik, onsinnig, amateuragtig en statisties totaal onbruikbaar is.

Die meningspeiling het opslae in die koerante veroorsaak en die volgende is o.a. daaroor berig:

“Proff. Hermann Giliomee en Christo Viljoen, uittredende raadslede, het beswaar teen die onwetenskaplikheid van die vraeboog en die gelaaide vrae gemaak.

“Volgens hulle is niemand ten gunste van Afrikaans as eksklusiewe onderrigtaal of verwag niemand van die US om "Afrikaans te red nie".

“Hulle sê om ten gunste van 'n volwaardige en vaste voorgraadse aanbod in Afrikaansmedium te wees, is nie strydig daarmee dat die US internasionale aansien verwerf of dat sy grade nie internasionaal erken word nie.

“Prof. Pieter Kapp, president van die konvokasie, meen die opname kan 'n verleentheid vir die US skep as oud-Maties dink dit word namens die universiteit onderneem, terwyl dit nie die geval is nie.

“Prof. Laurie McFarlaine, Pretorianer en oud-Matie wat voorheen by die Universiteit van Pretoria (UP) was, het gesê dit is die belang van studente dat hulle in Afrikaans moet kan studeer. "Dit is twak om te suggereer dat as hulle in Afrikaans onderrig word, hul opleiding minderwaardig sal wees en nie aan internasionale standaarde voldoen nie."

“Hy het gesê om in Afrikaans te wil studeer, beteken nie 'n mens is teen Engels of dat jy nie in Engels vaardig is nie.

“Dr. Danie Roos, afgetrede fisikus en vroeër verbonde aan die WNNR, meen dis absurd om te moet kies tussen akademiese statuur, Afrikaans as eksklusiewe onderrigtaal en 'n graad wat internasionaal erken word. "Die vrae is ongehoord en 'n subtiele armdraai-taktiek om te wil hê Afrikaans moet aan die US verdwyn."

“Dr. Bertie du Plessis, navorser van Pretoria en oud-Matie, meen 'n universiteit moet grade toeken wat enige plek ter wêreld erken word. "Afrikaans is nie 'n struikelblok om die ideaal te bereik nie. Inteendeel, dit gee mense 'n voorsprong bo die wat slegs in Engels oor hul vak dink”

Hertzog het erken dat die vraelys deur onafhanklike konsultante en kennisse van hom, naamlik Charmain Lines en Francois Baird, opgestel is, en sê: “Ons is wel daaroor ingelig en was gemaklik met die konsep.”